ភ្នំពេញ៖ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានប្រាប់ ឱ្យដឹងថា នគរបាលពីរ នាក់ ដែលបង្កការអុកឡុកនៅហាងផឹកស៊ីយីហោ THE CORNER នៅផ្លូវលេខ១៣៦ កែងផ្លូវលេខ៥ សង្កាត់ផ្សារកណ្តាលទី១ ខណ្ឌ ដូនពេញនៅយប់មិញនោះ ត្រូវបាននគរបាលអគ្គស្នងការដ្ឋានឃុំខ្លួនហើយ បន្ទាប់ពីស្រាវជ្រាវរកឃើញអត្តសញ្ញាណនៅរសៀលថ្ងៃទី ១៦ ខែកក្កដា ឆ្នាំ២០១៦នេះ។

ឯកឧត្តមនាយឧត្តមសេនីយ៍ឲ្យដឹងថា នគរបាលទាំងពីរនាក់នោះ នឹងត្រូវរងពិន័យតាមច្បាប់នគរបាល។ លោកថា «អគ្គស្នងការបានចាត់ ចែងស្រាវជ្រាវ ហើយបានរកឃើញភា្លម និង បានចាត់ចែងដាក់ពិន័យតាមច្បាប់បទបញ្ជាស្តីពីវិន័យនគរបាលហើយ»។

សូមជម្រាបថា នៅម៉ោង ១និង២០នាទីយប់រំលងអាធ្រាត្រាឈានចូលថ្ងៃទី១៦ ខែកក្កដា ឆ្នាំ២០១៦ មានជនទំនើងមួយក្រុមមានទាំង នគរបាលស្លៀកឯកសណ្ឋានពីរនាក់ផងដែរ បានស្ពាយកាំភ្លើង AK ហើយស្រែកថា «អញមកពីអគ្គ...» ជិះម៉ូតូណៃហតពាក់ស្លាកលេខ  នគរបាល 1-1637 មកគំរាមបាញ់រះទៅលើភ្ញៀវ ដែលជាគូជម្លោះនៅក្នុងហាងផឹកស៊ីពេលរាត្រីយីហោ THE CORNER មានទីតាំង ស្ថិតនៅតាមបណ្តោយផ្លូវលេខ១៣៦ កែងផ្លូវលេខ៥ សង្កាត់ផ្សារកណ្តាលទី១ ខណ្ឌដូនពេញ។ ហេតុការណ៍នេះ បានធ្វើឲ្យម្ចាស់ហាង  និងភ្ញៀវ ព្រមទាំងប្រជាពលរដ្ឋនៅក្បែរហាង ភ័យឡើងព្រលឹងចុងសក់។

សាក្សី បានឃើញហេតុការណ៍ផ្ទាល់ភ្នែក បានឲ្យដឹងថា «នៅយប់មិញនេះ ស្ថិតនៅហាង THE CORNER ដែលជាតំបន់ភ្ញៀវទេសចរ  ឆ្លងកាត់ស្ទើរទល់ភ្លឺនោះ ស្រាប់តែមានជនទំនើងពីរនាក់ជិះម៉ូតូ ម៉ាកសេ១២៥ ស្លាកលេខ ភ្នំពេញ1AF-7604 បានមកផឹកក្នុងហាង ខាងលើ។ បន្ទាប់ពីផឹកស្រវឹងពួកគេក៏បញ្ចេញ សកម្មភាពច្រងេងច្រងាង ធាក់តុកៅអី ស្រែកឡូឡា ចង់បង្កហិង្សាជាមួយភ្ញៀវ ដែលផឹក ស៊ីក្បែរគ្នា ពេលនោះម្ចាស់ហាងក៏ទៅឃាត់និយាយ លួងលោមដើម្បីកុំឲ្យមានជម្លោះ ធ្ងន់ធ្ងរក៏ជនទាំងនោះក៏ជិះម៉ូតូចេញទៅ»។  

សាក្សីបានបន្តទៀតថា មួយសន្ទុះក្រោយមកគេបាននាំបក្ខពួកជាប៉ូលិស មានទាំងឯកសណ្ឋាន និង ជិះម៉ូតូណៃហត ស្លាកលេខនគរបា ល 1-1637 មកស្រែកឡូឡាពេញមុខហាង រកវាយម្ចាស់ហាង និងដកកាំភ្លើងម៉ាក AK ពីបក្ខពួកបម្រុងបាញ់រះមកលើភ្ញៀវទេសចរណ៍នៅ បរិវេណខាងក្រៅហាង  ថែមទាំងស្រែកថា «អញមកពីអគ្គ... ហ្ហែងឆាប់ហៅភ្ញៀវមកលត់ជង្គង់ សុំទោសអញភ្លាម បើមិនចឹងទេអញ បាញ់ងាប់ទាំងអស់ ហាងហ្ហែងនឹងបិតឆាប់ៗ...»។

ពេលនោះ ម្ចាស់ហាងខំសម្រួលអង្វរយ៉ាងណា ក៏ជនពាក់អាវក្រឡាការ៉ូនោះមិនស្តាប់ដែរ ហើយថែមទាំងរកវាយទៀតផង ដោយមាន  មនុស្សចោមរោមមើលច្រើន ជនទំនើងទាំងនោះ បាននាំគ្នាជិះម៉ូតូចេញទៅបាត់ ដោយបន្សល់ពាក្យគំរាមថា «ចាំតិចទៀតអញមក,  ប្រយ័ត្នខ្លួនពួកហ្ហែង..»៕